ഒറ്റ വരി

ഒറ്റ വരിയില്‍
വരകളെല്ലാം നിറയണം.
വരങ്ങളെല്ലാം കിളിര്‍ക്കണം ..
ഒറ്റവരിയില്‌
മറയില്ലാതെ ദൈവത്തിന്റെ
മൊഴികളെല്ലാം നിറയണം...
ഒരൊറ്റ വരിയില്‍ തളിര്‍ക്കണം
മരണത്തിന്റെ നാണങ്ങലെല്ലാം
ജീവിതത്തിന്റെ നുണകളെല്ലാം ..
ഒരൊറ്റവരിയില്‌
ഇടിമിന്നല്‍ പോലെ നിറയണം
നിന്നിലുള്ള എന്നനുരാഗം..
ഒറ്റവരി കൊണ്ട്
കവക്കണം ഈരേഴു ലോകവും ..
ഒറ്റവരിയില്‍ ഉറഞ്ഞാടണം
എല്ലാ ആര്ത്തികളും ശാപങ്ങളും ..
ഒരൊറ്റവരിയില്‌ മരിക്കണം
എല്ലാ ആശകളും..
എല്ലാ മൌനവും പൊട്ടി ചിതറണം
ഒറ്റവരിയില്‍..
അതെ ..ഒറ്റവരി കൊണ്ട് എനിക്കവളെ തൊടണം .
ഒറ്റ കിനാവായി, ഒറ്റ മന്ദാരമായി
ഒരൊറ്റ..ഒറ്റ...
ഒറ്റ വരിയില്‍
ഒറ്റ ശ്വാസത്തില്‍
ഓംകാരമാകണം

ഒരു രാത്രി

ഒരു രാത്രിയുടെ കറുപ്പിന്
അവളുടെ കരളിന്റെ അഴകായിരുന്നു.
എന്റെ കാമത്തിന് പെയ്തിരങ്ങാനുള്ള
കാര്‍മേഘം ആ കണ്‍തടതിലുണ്ടായരുന്നു .
ഉപ്പുരസമാര്‍ന്ന അവളുടെ തൊലിയില്‍
ഏഴു സാഗരവും അലയടിച്ചു
സ്വര്‍ഗത്തെ വിളിച്ചുണര്‍ത്തുന്നുണ്ടായിരുന്നു .
ഒരു കനവു കട്ട് കൊണ്ട് പോയ
കള്ളനെ അവളുടെ നുണക്കുഴിയില്‍ നിന്നും
ഞാന്‍ വലിച്ചെടുത്തു

കൂട്ട്.. .

..................
 സ്വപ്നങ്ങളെ ഇറുത്ത്  വെക്കാന്‍  
അവളുടെ കവിളിനെ
ഞാന്‍ കടം വാങ്ങി .
പാപങ്ങളെ ഒളിപ്പിച്ചുവെക്കാന്‍
അവളുടെ കണ്കളിലെ
നനവിനെ ഞാന്‍ പകര്‍ത്തിയെടുത്തു .
എന്നെ ഒളിപ്പിച്ചു വെക്കാന്‍
അവളുടെ ആത്മാവിന്റെ
ഗുഹകളെ ഞാന്‍ തേടിച്ചെന്നു .
ദൈവത്തെയും സ്വര്‍ഗത്തെയും
കാണാനുള്ള യാത്രയില്‍
ഇപ്പോഴും  അവളുടെ
പരാതികളാണ് എനിക്ക് കൂട്ട് .      

തൊട്ടത്‌.. ..............

അനന്തതയെ ഞാന്‍ തൊട്ടത്‌
നിന്റെ ചുണ്ടിലൂടെയായിരുന്നു  .
കൊടും തീയെ പുണര്‍ന്നത്‌
നിന്റെ പ്രണയം എന്റെ നെഞ്ചില്‍ പടര്ന്നപ്പോളാണ്.
ദുഖത്തിന്റെ എറ്റവും
 കറുത്ത പൊട്ടു   ഞാനെടുത്തത്
നിന്റെ കണ്ണിന്റെ ആഴങ്ങളില്‍
നിന്നായിരുന്നു
ഒന്നും പറയാതെ മറന്നു പോയ
എന്റെ മൌനം
ഇന്നെന്നെ തേടി വീണ്ടും
വാതില്‍ക്കല്‍ വന്നു നില്‍ക്കുന്നു.