വേദന തിന്നുന്നത് ശരീരത്തെ അല്ല,
സ്വപ്നങ്ങളെ കൂടിയാണ്.
ദാഹങ്ങളെ അത് പകുതി കടിച്ചു തുപ്പും.
സ്നേഹങ്ങളെ അത് കാലുകൊണ്ട് അരയ്ക്കും.
വേദന തിന്നുന്നത് എന്നെയും നിന്നെയും മാത്രമല്ല;
നമ്മിൽ പിരിയാതെ തെളിയും ആത്മബന്ധത്തെ കൂടിയാണ്.
കണ്ണുകളിൽ ചിതലരിക്കും.
ആശ്ലേഷണത്തിന് ആയുന്ന കൈകളെ
പക്ഷവാതത്തിലേക്ക് ആഴ്ത്തും.
വേദന തിന്നുന്നത്.,
എല്ലാം തീരുമ്പോൾ ഒരു തീക്കാറ്റ്
കരളിൻ ഭിത്തിയിലൂടെ..
പൊട്ടിവീണ മുത്തുകൾ
പാതാളത്തോളം കാണാകയങ്ങളിൽ...
കാമുകി ഒരു മിന്നാര കാഴ്ച്ച,!
വ്യാമോഹത്തിന്റെ മറ്റൊരു പേര്!
സ്വപ്നം തരാൻ അവൾ തയ്യാർ
ജീവിതം അവൾക്ക് വേണ്ട.
മരണത്തിന്റെ അഴിമുഖത്ത്
അവൾ എന്നെ കൊണ്ടു നിർത്തി.
വീണ്ടും ഒതുങ്ങി ഒതുങ്ങി
വറ്റി വറ്റി ഇല്ലാതാവുകയാണ് ഈ പാത്രം.
ആരാലും നിറക്കപ്പെടാതെ
ആരാലും ചുംബിക്കപ്പെടാതെ
ഇതാ തീരുന്നു.ഇതാ..
