ഇഷ്ടം

 അരൂപിയായ ഒരു ഇഷ്ടം, അതിന്റെ രേഖാചിത്രം 

 എനിക്കാവില്ല വരയ്ക്കാൻ. 

അതിന് ഉടുപ്പണിയിക്കാൻ പൊട്ടുകുത്താൻ 

കമ്മൽ ഇടീക്കാൻ എനിക്കറിയില്ല. 

ആത്മാവിലേക്ക് ഊറി കൂടിയത് ആയിരുന്നു അത്.

  എന്നെ പുണർന്ന് ദൈവത്തോളം

 ഉയർത്തി പുളകമണിയിച്ചത്.     

   ഒന്ന് തൊടാൻ ഒന്ന് ചുംബിക്കാൻ ആ ഇഷ്ടത്തിനെ..

..    എനിക്കിതുവരെ കഴിഞ്ഞില്ല. 

ആയുമ്പോഴേക്കും പറയുമ്പോഴേക്കും അത് 

ആവിയായി പിടി തരാതെ എനിക്ക് ചുറ്റും ഉലാവും. 

  അതിന്റെ രൂപം ഏതാണ്ട് നിന്റെ തന്നെ. 

അതിൽ അലിയാൻ കൊതിക്കാം എന്നല്ലാതെ 

ഒന്ന് ശരിക്ക് കാണാൻ പോലും എനിക്ക്  ആവതില്ല.  

 അരൂപിയായ ആ ഇഷ്ടം ഒരുവേള എന്നെ

 ഇവിടെ നിൽക്കാൻ പ്രേരിപ്പിക്കുന്നുണ്ടാകും.. തുടരാനും. 

ആ ഇഷ്ടമെന്ന ഇന്ധനമാണല്ലോ ഇന്നെന്റെ 

കണ്ണിലും കവിളിലും നിറഞ്ഞു വഴിയുന്നത്.